बागलुङ- ऐतिहासिक धार्मिक शक्तिपिठ बागलुङ कालिका मन्दिरमा साउन महिनामा कुल ६८ लाख ३१ हजार १७० रूपैयाँ आम्दानी भएको छ । बागलुङ कालिका भगवती गुठी व्यवस्थापन समिति, बागलुङले साउन महिनाको आय–व्यय विवरण सार्वजनिक गरेको हो ।  सार्वजनिक गरेको विवरणअनुसार विभिन्न शीर्षकहरूबाट जम्मा ६८ लाख ३१ हजार १ सय  ७० रुपैयाँ आम्दानी गरेको छ भने खर्चतर्फ १५ लाख २३ हजार १०० रुपैयाँ खर्च गरेको छ।

आम्दानीतर्फ सबैभन्दा ठूलो योगदान भाडाबाट आएको छ, जसको रकम ५९ लाख १ हजार ६४० रुपैयाँ रहेको छ। त्यस्तै भेटीबाट ६ लाख ८८ हजार ७८५ रुपैयाँ संकलन गरिएको छ। अन्य आम्दानी स्रोतहरूमा विवाह कार्यक्रम, आर्थिक सहयोग, चामल, बोका–बाख्रा लगायका रहेको गुठी व्यवस्थापन समितिका अध्यक्ष कुमार खड्काले जानकारी दिए । 

खर्चतर्फ १५ लाख २३ हजार १०० रूपैयाँ मध्य तलबमा ४ लाख ९ हजार, पुर्वाधार विकास तथा निर्माणमा ९ लाख ३१ हजार ७००,अतिथि सत्कार ५१ हजार बिजुली बत्ती लगायतका शीर्षकमा रकम खर्च गरिएको गुठीले जनाएको छ ।

कालिका भगवती गुठीले साउन महिनामा ६८ लाख ३१ हजार १७० रूपैयाँ आम्दानी १५ लाख २३ हजार १०० खर्च  कट्टा गरि ५३ लाख ८० हजार ७० रूपैयाँ बचत गरेको गुठीले जनाएको छ ।

कालीका भगवती गुठीले हरेक महिनाको पहिलो साता मन्दिरको आम्दानी खर्चको हिसाबकिताब सार्वजनिक गर्दै आएको छ ।